環保新政冇料到　乜都收費勁擾民

咪睇環境局局長邱騰華搞作多多，做嗰樣衰嗰樣，不過佢勝在面皮夠厚，屢敗屢戰，屢戰屢敗，衰完又嚟衰過，直頭要寫個服字。

呢嗱，港府迫於民意壓力，宣布放棄就立法會廢除堆填區指令提出司法覆核，開頭企硬，投降收場，輸得認真難睇。估唔到鬧劇主角邱騰華居然當冇事，仲出嚟繼續吹水，硬銷垃圾處理新策略，仲懶有創意咁用「三腳鼎」形容有關措施添。

「三腳鼎」係乜東東？按佢嘅講法，就係三管齊下處理垃圾，包括源頭減廢、興建現代化焚化設施同繼續擴建堆填區。仲以為有乜新意，原來又係新瓶裝舊酒。

先唔講其他，所謂源頭減廢其實有三招，就係將膠袋徵費推廣到整個零售業，徵收廢棄電子電器產品回收處理費，最攞命一招係，日後市民嘅家居垃圾隨時可能要按量收費。呢樣費，嗰樣費，總之巧立名目，將環保成本統統轉嫁畀市民。

叮！廢官減廢，樣樣收費，「新政」一曝光就畀人炳到飛起。有零售業人士形容「三腳鼎」係搖搖欲墜嘅「三腳櫈」，狂鬧當局只識招招講錢，透過收費逼市民減廢係擾民，令市民百上加斤，社會難以和諧。

亦有市民擔心，當局連建築廢物都搞唔掂，如果家居垃圾收費，香港人又唔願畀錢，「咪求其丟落街、後巷同天井囉！」減廢減到通街廢物垃圾，最廢環境局局長，邱騰華認第二，全世界睇怕冇人敢認第一咯。

計太一叮話齋，如果話環保新政係「三腳櫈」，用「三腳貓」嚟形容邱騰華本人就貼切不過嘞。只識幾下表面功夫，完全冇真才實學，搞環保唔撞板至奇啦。有市民質疑，睇勻各先進國家同地區，環保官員都係專業出身，但邱騰華身為負責環保嘅問責局長，並無呢方面嘅專業知識，完全靠升官坐上呢個位。

話時話，雖然邱騰華冇料到，但表演三腳貓功夫一啲都唔怯場，環保政策花樣多多，出完一個又一個，不過幾乎鋪鋪丟架鑊鑊都甘，一係見光死，一係半路縮沙，就算勉強實施，亦搞到唔湯唔水。

呢，除咗呢次先斬後奏，強徵郊野公園土地做垃圾堆填區被立法會叫停無功而還，徵收膠袋稅唔用於環保備受質疑；舊年閉門造車推出慳電膽現金券計劃，惹起「利益輸送」疑雲，卒之胎死腹中；推動電動車被指忽視本土科研成果飽受批評；停車熄匙苛政又因為運輸業強烈反對，最後豁免呢樣，豁免嗰樣，基本上名存實亡。

邱騰華不學無術好大喜功，三腳貓功夫一出場就露出破綻，唔止失禮街坊，更加失禮香港，咪再攞出嚟獻世咯。叮！