政情：搞搞政：德成局長插隊絕地掙扎

下個禮拜五晏晝召開嘅立法會財務委員會，將審議政府申辦二○二三年亞運會撥款，喺依家嘅政治形勢下，幾可肯定屆時將宣布申亞「死亡」，但民政事務局局長曾德成似乎仲死心不息喎！

話說民政事務委員會喺當日八點半召開會議，議員陳淑莊早前以緊迫為由，要求討論監管私人遊樂契約，而委員會待議事項一覽表仲列明喺今個月討論添，點知近日睇吓議程，呢單嘢冇咗影，反而新加討論對精英運動員加強支援改善其就業前景嘅措施。陳淑莊火都嚟埋，去信質問委員會主席葉國謙點解隨便調動議程，阿謙就攞出民政局嘅文件嚟否認，話民政局指精英運動員緊迫啲，要求委員會先作討論，總之唔關佢事啦！

德成局長之前都搬過精英運動員出嚟撐申亞，依家搶住喺財委會審申亞撥款前，又再搬精英運動員出嚟游說議員，擺明係垂死掙扎。但無論佢點掙扎都好，結果可能都係一樣：「判死刑」。