窮人等開倉 財爺拒派糖

雖然高官近排扮晒親民，呢個賣黐鬚預算案諮詢廣告，嗰個唱Rap版「起錨」聖誕歌，但係做嘢就同民意背道而馳。唔怪得最新調查發現，七成受訪年輕人唔信政治人物會講真話，對港府嘅政策回應極之失望。

呢嗱，財政司司長曾俊華又示範表演乜嘢叫罔顧民意，亂噏廿四嘞。佢尋日居然同民意大唱反調，話港府絕對唔係守財奴，而係「應使則使」，搏命為縮骨政府一毛不拔、拒絕「派糖」辯護。

係人都知，社會上要求當局「派糖」嘅呼聲愈來愈高，百物騰貴，打工仔收入升幅追唔上通脹係最主要原因。估唔到鬍鬚曾居然話，唔可以將「派糖」視為解決問題嘅唯一方法，呢類措施對整體消費會有過度嘅刺激作用，可能反過嚟會加大通脹壓力喎。

叮！簡直係本末倒置，九唔搭八。通脹猛於虎，收入大縮水，市民惟有節衣縮食。港府對民生疾苦視而不見唔在講，居然縮骨到用通脹做藉口，拒絕幫助低下階層。家陣柴米油鹽交通費呢啲直接影響市民生活嘅開銷幾乎冇一樣唔加，貧困家庭連買棵菜、買個菠蘿包都要算過度過，點推高通脹呀？你話港府係咪不知所謂吖。

鬍鬚曾仲「強調」話，當局過往推出多項利民紓困措施，係「非常時期」作出嘅「非常措施」，唔可能長期持續喎，好明顯係想降低市民對新財政預算案「派糖」嘅預期。唔該財爺話畀市民知，點為之「非常時期」。失業率長期冇改善算唔算？辛辛苦苦賺嘅血汗錢被通脹蠶食，年年變相減人工又算唔算？當局係咪要等到民怨爆炸至採取「非常措施」？叮！

講到港府坐擁龐大儲備都唔幫窮人，鬍鬚曾嘅解釋更加離譜，佢重彈「大市場，小政府」嘅陳腔濫調，話財政儲備係政府嘅「應急錢」，除咗可以應付突發需要，仲可以應付暫時性財政困難，政府唔係孤寒，而係「應使則使」啫。

叮！應使則使係假，該使唔使就真。回歸十幾年，香港人均GDP實質增長咗五成，但基層市民收入不升反跌，貧困人口持續增加，貧富懸殊不斷惡化。家陣通脹壓力水浸眼眉，低下階層負擔百上加斤，當局口口聲聲話幫市民解困，其實就處處設限。呢，就好似為貧困人士提供嘅交通津貼咁，核實申請直頭好似查家宅咁款，都唔知係想幫人定靠害。

立法會各政黨會向港府「追債」，要求採取減稅、免差餉、免公屋租金、提高長者醫療券等等一系列措施紓解民困。呢啲既係「非常時期」嘅正常訴求，亦係市民嘅心聲，就睇新預算案有乜嘢「非常措施」嘞。叮！