Sun世代：一身好武功轉戰商界

曾三奪南拳及南棍世界冠軍，鄭家豪退役後一度迷失，感覺猶如從天堂貶謫凡間，「由世界冠軍突然變成乜都唔係，覺得前路茫茫，個人好down（失落）。」幸好遇到黃德森，助他透過奧委會的運動員就業計劃找到新工作。他現在穿上西裝轉戰商界，肩負向商界推廣體育的使命，「要體育普及，商界支持好重要！」

三十一歲的鄭家豪是○三年度香港傑出運動員兼○九年十大傑青，更於九九、○三及○五年，三奪世界武術錦標賽南拳及南棍冠軍，威水史一大籮。○五年退役的家豪，已由昔日的功夫小子，變成今天的西裝骨骨，有誰想到武術界的天之驕子，曾經歷人生低潮？

遇黃德森走出低潮

「退役後，我去咗中國社會科學院讀文學碩士，中科院喎，唔係人人入到㗎，但○八年返到香港搵工，個人好迷茫，唔知條路點走。」做運動員，有計劃、有目標，做回平凡人，他像沒有軌道的火車，不懂駛往前方。「自己係三次世界冠軍喎，突然變成乜都唔係，個人好down（失落），差不多崩潰。」

他明白運動員要不屈不撓，就在此時碰到黃德森。黃德森是香港奧委會「運動員就業及教育計劃」項目經理，透過計劃為他找到合和實業社區服務主任一職。「當時搵工搵到心驚，原本諗住繼承阿爸嘅武館，但Sam哥（黃德森）叫我邊學邊做，真係好感謝佢。」

「做社區主任，經常探訪老人家，到學校做講座，平均一年做一百個活動，好開心！」他最愛將運動員永不放棄的精神與人分享，在公司還邂逅了現任女朋友，但最令他意外是認識了老闆胡文新。「冇諗過咁高層嘅人會咁nice（親切），係人都知佢玩冰球好叻，但原來佢對運動嘅理念同自己好一致，大家都認為做人同做運動員一樣，最緊要有信念。」去年五月他轉任合和公路基建項目發展主任，經常中港兩邊走，「我仲係學習階段，好感激一班好上司、好同事教導。」

游說商界支持體育

加入商界，他有一個更重要的使命。「要真正普及體育，商界支持好重要！老實講，現時商界對本港運動嘅支持不足，香港人亦唔係人人愛運動，公民意識不強，否則申辦亞運都唔會咁多分歧啦。」

家豪希望為體育界出分力，目標是推廣全民普及運動。「運動有團結人心嘅力量，如果年輕人都喜歡運動，一定唔會咁多人濫藥，遇到困難亦唔會輕易退縮。」他另一個使命是宏揚武術，「武術唔係打交、爛仔！武術好着重武德，好想將武術帶入商界同教育界。」

鄭家豪小檔案

年齡：31歲

現職：合和公路基建有限公司項目發展主任

學歷：北京體育大學運動訓練教育學士，中國社會科學院中國文學碩士

所獲榮譽：

2009十大傑出青年

2008奧運會香港區火炬接力第74棒火炬手

2007行政長官社區服務獎狀

2005第八屆世界武術錦標賽男子組南棍金牌

2004全港公開武術錦標賽男子成人（精英組）南拳冠軍

2003第七屆世界武術錦標賽男子組南拳冠軍

2003年度香港傑出運動員

1999第五屆世界武術錦標賽男子組南棍冠軍