政情：李少光聞王丹封嘴
司徒華辭世後，本地嘅焦點轉咗去前學運領袖王丹同吾爾開希能否獲批來港，一眾官員去到邊都畀人問，偏偏煲呔曾或相關官員都做晒鵪鶉唔敢回答。尋日，保安局局長李少光喺香港會所外現身，被問到學運領袖究竟有冇機會嚟香港，光哥把口好密實，佢笑笑口咁話：「呢個問題唔答喇，一答畀人鬧呀！」
光哥講咗等於冇講，不過勝在夠直率。其實，華叔去世當晚，光哥已經話過，只要有心，哀悼華叔唔使一定嚟香港，又話香港有獨立嘅出入境政策及制度。佢咁講，已經係做緊期望管理啦，即係萬一海外人士嚟唔到致祭，大家都唔使咁失望，只要有心就得嘞。不過，呢句答案好難滿足香港人㗎喇，睇嚟特區政府有排煩。