政情：金勞詹皮膚美容眼都腫
貪靚係人嘅天性，年過六十嘅立法會議員詹培忠（金勞詹）都係貪靚之人，前幾日佢仲好勇敢咁去整容，即係接受PRP自體血漿生長因子皮膚回春術，呢個手術嘅Platelet Rich Plasma，中文為高濃度血小板血漿，可以刺激皮膚嘅母細胞更新活化，令皮膚再生，而且安全性相當高，據講香港做呢類手術要幾萬蚊㗎。
由於做完手術冇耐，尋日喺中環萬年大廈見到金勞詹時，佢要戴個黑超遮吓，期間仲撞到個朋友添。佢話有朋友向佢推介呢種療程，咪試吓囉，不過啲副作用搞到眼腫，所以尋日要睇醫生消腫，仲要買多副太陽眼鏡遮一遮添！睇嚟，大家要遲吓先可以睇到佢美容嘅成果。
詹培忠戴住太陽眼鏡等候座駕嚟接，隱約見到佢雙眼有啲腫。