政情：搞搞政：林鄭發叔拍住冧檔

連日低溫，加上流感肆虐，好多人都不適病倒，包括政圈一對好朋友，即係發展局局長林鄭月娥同行政會議成員劉皇發。不過，好打得嘅林鄭尋日睇完醫生仲撐住返工，發叔就缺席立會，連條口頭質詢都要由同屬經濟動力嘅梁劉柔芬幫手。

尋日晏晝三點幾，戴住口罩嘅林鄭喺中環皇后大道中出現，見佢拎住手袋同文件，腳步浮浮咁行向政府總部。佢雙眼冇晒神，黑眼圈盡現，直頭跌晒Watt。佢透露，啱啱因為感冒睇完醫生，之後仲要返辦公室搏過。

其實，佢嘅好友發叔都病咗，尋日仲缺席立法會大會添。林鄭同發叔私交甚篤，好多新界活動或者係發叔嘅慶祝活動，都見林鄭捧場，估唔到呢對政壇好友連病都一齊病。除咗佢哋，康樂及文化事務署署長馮程淑儀都中咗招，把聲沙晒，立法會議員張文光介紹佢飲民間古方「胖大海」，飲咗一日，把聲開番七成。