政情：謝凌潔貞係教局橋樑

由勞工處處長升任教育局常任秘書長嘅謝凌潔貞（Cherry），履新未夠一個月，已經同傳媒見面，講到教育工作時，佢好自然回憶起○一年做教育統籌局副常秘嘅歲月，同當時嘅局長「阿瑟王」李國章及常秘羅范椒芬共度三年零九個月，真係好多感慨。

曾被視為翻版羅范

Cherry同羅范做同事期間，因工作關係形影不離，又同時在職攻讀教育碩士課程，所以曾被視為「翻版羅范」。Cherry尋日話，羅范語文能力高、記性好，又勤力，自己冇得比，又指羅范引進「三三四」高中新學制同直資學校，為教育界注入動力。

唔講唔知，當年教統局曾有句將佢哋三人英文名串成嘅順口溜：「Arthur the king, Fanny the law, Cherry the link」，簡單譯就係李國章呢位「教育沙皇」，行事作風好似王者咁霸氣；羅范就好強硬，佢講嘅就係法律；至於謝凌潔貞咪係連繫佢哋嘅「橋樑」囉。