政情：撥款凍過水申亞官員鬥快閃

好可能成為政府喺二○一一年第一個滑鐵盧嘅申亞撥款，下禮拜五就會上立法會衝線，不過，民政事務局一眾官員近日卻有集體放軟手腳之嫌，民政事務局局長曾德成同副局長許曉暉冇影，而政府專就申亞成立嘅申辦亞運專責小組組長陳育德就提出提早離職，搞到申亞小組被迫陣前換將，由副組長陳積志頂上做臨時工一個月。呢個團隊嘅申亞之戰好似虎頭蛇尾咁，難怪政圈都睇死下禮拜嘅申亞撥款冇運行。

陳育德提早結束任期

下禮拜五，民政局就會向立法會申請六十億元撥款，雖然政府出動好多體育明星拉票，但依家票數亦絕唔樂觀，尋日民政局更證實，陳育德會提早結束原本到二十八號嘅任期，至於佢嘅工作，就由申亞小組副組長陳積志頂上，反正都係得番唔夠一個月任期。換言之，嚟緊嘅撥款會議，將由德成局長帶埋陳積志等上陣。

陳育德走得咁急，據講係佢嘅老父跌親，民政局發言人都話佢需要照顧家人。不過，熟悉政府運作嘅人都話，陳育德突然離任，一方面係因為私務好緊要，另一方面何嘗唔係因為申亞工作已經半隻腳入咗雪櫃？陳育德提早離場，只係顯示政府申亞工程距離埋尾不遠啫。

新年後民政局冇搞作

政圈口痕友都話，聖誕、新年長假期之始，政府嘅文宣攻勢都冇減少，但入咗新嘅一年，卻唔見民政局有乜大搞作，今日立法會將會辯論推動長遠體育發展嘅動議，德成局長一定要領銜主演，今次已經係民政局喺下禮拜撥款前最後一次公開游說，最後一擊真係要搏盡喇！