購物天堂再發威 本土經濟有可為

新年新氣象，第四十五屆工展會尋晚收爐，埋單計數，丁財兩旺。主辦單位估計，入場人次高達二百四十萬，營業額更加增長咗三到四成，可望達到五億元。參展商開心，消費者盡興，購物天堂果然名不虛傳。

呢屆工展會仲有一樣新氣象以往從未見過，撞口撞面都係內地客，五湖四海，口音各異，但有個共同特點，就係好疏爽，大包小包買到唔停得手。據估計，內地遊客佔入場人次比例至少有兩到三成。計落同胞為工展會貢獻咗至少一億幾千萬，認真巴閉。

除咗工展會，啱啱過去嘅聖誕新年假期，本港無論各大購物商場定係冬季購物節，又或者美食嘉年華，到處見到內地客大破慳囊、大手購物嘅身影。消費暢旺，唔少商場營業額同人流都錄得可觀增長。

咁好景，原因包括「人仔」升值，同胞水頭充足，內地政策放寬，譬如廿四小時通關、「一簽多行」，以及開放非廣東戶籍深圳常住居民赴港個人遊等等，為本港帶嚟更多商機，令購物天堂塊金漆招牌重現光輝。

家陣無論本地節假日定內地黃金周，內地客紛紛湧落嚟消費。其實，呢個既係香港嘅機遇，同時亦係挑戰，如果香港唔搞搞新意思諗多啲噱頭吸引呢班米飯班主，今日呢個勢頭，睇怕維持唔到幾耐。叮！

講到吸引遊客，有乜嘢好得過本土特色？嗱，好似北京前門小食一條街、台北夜市、泰國曼谷水上市場同新加坡克拉碼頭娘惹美食節等等，最啱個人遊。別具特色，令人一遊難忘，去過一次就想去第二次。睇番香港，想搵啲具本土特色嘅節目，真係爆頭都諗唔出有乜好介紹。

發展本土特色經濟除咗吸引遊客，仲可以為低下階層提供更多就業職位。十幾年來製造業不斷北移，本港實體經濟已經空洞化，如果港府唔喺發展本土特色經濟方面做多啲工夫，創造基層就業職位，小市民惟有攤大手板等救濟。

多年前上環嘅「大笪地」，飲食、購物、表演各自各精彩，都算得上本土特色經濟咯。梁錦松做財爺嗰陣曾提出「振興本土經濟」，仲喺黃大仙搞過「騰龍墟」添。攤檔生意亦紅過一陣，只可惜活動完咗，當局就關人個關，冇晒下文。後來又話喺天水圍預留土地搞美食坊，但係講咗幾年，乜都冇做到。

想吸引內地同胞源源不絕來港旅遊同消費，港府一定要有新思維。如果毫無本土特色，人哋為乜要嚟幫襯先？計太一叮話齋，港府與其吹乜鬼「六大優勢產業」，不如腳踏實地振興本土經濟更實際啦！