SUN世代：闖出木人巷 帶品牌高飛

香港中華出入口商會秘書長許華傑，是已故立法會議員許長青長子。別以為「老竇賺錢仔享福」，他畢業於美國名牌大學，接掌家族生意後，也要由最基本的認布辦做起，「最初深深不忿，做到眼濕濕，依家會慶幸，因為有冇料到，個客一睇就知。」他現在致力開拓內地市場，發揮香港優勢，帶領內地品牌衝出國際。

許華傑（Michael）四十二歲已是家族製衣公司「福登實業」董事總經理，他強調自己不是富二代，「『褲二代』就有份，我做得有血有汗㗎！」他有一弟兩妹，小時候家境並不富裕，「父母做嘢好勤力，我七、八歲之前都係畀外婆湊，同父母細佬分開，後來家境穩定先一家團聚，老土啲講，真係獅子山下嘅故事。」

難忘拜會「武林高手」

他十五歲到美國升學，九○年畢業於康奈爾大學經濟系，「話晒讀名牌大學，唔出去闖吓點甘心！」畢業後留在美國七年，做過房地產開發和物業管理。

九七年父親當選立法會進出口界議員，無暇兼顧生意，Michael負起長子責任，回港接手業務，「以為好巴閉，點知畀阿爸掟入倉check布料，學排料、排色、剪布卡！」兩年後父親讓他見客，卻只許他旁聽，不准他出聲，「佢覺得我未夠班，淨係畀我喺側邊學吓點計價。」他坦言當時深深不忿，「做到眼有淚光㗎！」

那時候Michael常去深水埗訂布，情況竟有點像拜會武林高手。「嗰度個個都係老行尊，佢哋好似武俠小說入面啲高手咁，初時會寸吓你，見你都識嘢喎，慢慢就會過真功夫畀你！」現在回想，這段日子令他畢生受用，「成件衫最貴係布料，呢part最易畀人呃，一定要拎上手就講得出係乜，見客時，有冇料到，個客會知。」

中小企須增值建品牌

現今的第二代不易為，他有感而發：「喺廣東省做廠好困難，當地生活水平提高咗，成本上漲係自然嘅事，我接手之後直情有前路茫茫嘅感覺。」

他認為中小企要「value added（增值）」，建立自己品牌做內銷才是可行的出路，但是單靠中小企的力量，未必能夠應付。「香港叻在marketing（市場學）、形象、有海外市場經驗，呢啲都係內地欠缺嘅。內地名牌有邊個可以打入國際市場？諗落真係冇！」

「發揮香港優勢，協助內地品牌國際化，係一條新出路，但成功後，我可能被『飛』，所以唔可以純做agent，一定要入股。」他最近便入股內地戶外服飾品牌「Molife」，利用公司已有渠道，出口到澳洲、歐美等地。「出口好重要，除咗幫內地品牌做，自己亦會keep住做小品牌，香港、內地兩方面發展。」

許華傑小檔案

年齡：42歲

學歷：美國康奈爾大學經濟系畢業

現職：福登實業有限公司董事總經理

婚姻狀況：已婚，太太為律師董夢瑩，育有六歲及兩歲兒子。

公職/參與事務（部分）： 香港中華出入口商會秘書長

中央政策組非全職顧問

進出口行業培訓諮詢委員會主席

香港青年聯會首席參事

中華全國青年聯合會常務委員

湖北省政協委員