政情：建仔搞對沖封殺申亞撥款

立法會財委會喺今個月十四號審議政府申亞撥款，本來幾乎鐵定觸礁，但突然橫生枝節，三月喺北京召開嘅人大、政協「兩會」，其預備會同樣十四號喺深圳舉行，咁就考起十四名身兼全國人大、政協嘅「雙料」議員。建制派進退兩難，為防範否決申亞撥款甩轆出意外，正考慮採用議員缺席「對沖」機制。

「對沖」機制運作起嚟並唔複雜，以今次申亞撥款為例，由十四名雙料議員協商，有幾多個支持申亞撥款嘅議員打算上深圳開「兩會」預備會，就調配幾多個打算投反對票嘅議員「拍拖」北上，由於正反議員數目相同，咁就唔會影響表決撥款嘅正常賽果嘞。

立法會議員以「對沖」機制，確保財委會否決撥款唔會翻車出軌，應該係破天荒第一次，而今次嘅提議者係建仔主席譚耀宗。

以目前投票形勢，建仔手握關鍵八票，加上二十一名民主派議員同新民黨主席葉劉淑儀，合共三十票，以財委會最多投票人數為五十八名計（立法會主席同財委會主席劉慧卿一般唔投票），剛好足夠否決撥款，但形勢極牙煙，只要有兩、三人缺席，支持陣營就有可能反敗為勝。

按「對沖」機制，即若有三名支持撥款嘅雙料議員喺十四號上深圳，現有四名雙料議員嘅建仔，其中三人要陪太子開預備會，譚Sir提出搞「對沖」，換個角度，變相攬咗個責任上身，但如果有黨員唔生性，應承咗配對北上，又臨時甩底留港投票，咁就天下大亂，祝佢好運。