政情：搞搞政：葉劉遊峇里捍衞髮型

立法會議員葉劉淑儀喺早前嘅聖誕Boxing Day陪囡囡榮欣去印尼峇里島玩咗六日，入住五星級酒店，散心叉電。峇里以Spa聞名，葉劉有酒店每次千四蚊嘅豪華Spa唔享受，反而踢住波鞋周街逛，拖住榮欣去幫襯四十蚊一次嘅街邊按摩店，過平民假期。

葉劉唔恨歎豪華Spa，但對頭上三千煩惱絲就絕唔馬虎，葉劉有句名句：「連自己個髮型都捍衞唔到，點捍衞國家安全！」佢果然離開香港都要捍衞髮型，按摩可以幫襯街邊店，洗頭恤髮就一定要交畀酒店內嘅高檔Salon打理，隔日去一次，每次收費三百蚊，佢仲話：「價錢唔太貴吖。」

峇里之旅，佢日間逛平民市集，夜晚則尋覓別致高級餐廳，節目豐富，可惜臨走前一晚，囡囡榮欣留咗部iPhone喺的士，囡囡喊咗一晚，破財事小，葉劉全程靠囡囡部手機影相留影，依家冇得放相上facebook同大家分享旅遊喜悅，真係可惜。