政情：梁定宇囝囝朗誦攞冠軍
嚟緊東華三院分別會舉行「東華愛心競技同樂日」同「萬眾一心耀東華」慈善音樂會，主席梁定宇尋日喺記招上當然落力呼籲人捐錢啦。每個東華主席在任期間都要全身投入，梁定宇亦唔例外，今年佢都冇乜時間做番本行。
生意可以暫時放低，囝囝就點忙都要抽時間陪。上禮拜六佢就陪五歲囝囝晉熙去參加朗誦比賽，結果聲音雄厚嘅晉熙冇令爸爸失望，攞咗個冠軍。梁定宇太太喺國內開設英文教育中心，晉熙嘅教育方向就由媽媽全力負責。五歲嘅晉熙課餘仲有一張全面時間表，琴棋書畫都有學習，所以即使父母唔得閒陪佢都唔怕會悶。
梁定宇笑言雖然自己主力同囝囝玩，但如果兩夫妻同囝囝三人行嘅話，晉熙就始終都係親媽咪多啲。咦！聽落好似有啲酸溜溜喎！
