政情：林公公騰雞追魂Call 叫建制派護駕

為確保政改本地立法順利過關，政府下令建制派議員空群而出報名參加立法會嘅法案審議委員會，除咗要霸住委員會正副主席席位外，據聞仲有另一個目標，就係確保委員會可以踩行油開快車，喺三個月內完成草案審議同通過三讀程序，令當局有充足時間完成之後嘅附屬立法同具體選舉安排。不過有建制派就批評負責草案嘅政制及內地事務局局長林瑞麟過度騰雞，質疑根本毋須搵咁多人入會，擔心最後只會玩殘佢哋同政府。

狼來了致放鬆防備

早幾日講過，距離截止前數小時，已經有三十一名、即啱啱過半數議員報咗名參加有關草案委員會。尋日立法會秘書處公布嘅正式名單，竟然再有七名議員趕尾班車入會，即最後有成三十八名委員，隨時仲多過立法會大會開會。

喺三十八名委員當中，泛民主派只佔十三人，建制派則有二十五人，幾乎係泛民嘅兩倍，肯定可保住委員會正副主席席位。而主席預計由建仔主席譚耀宗出任，副主席就應該係經濟動力林健鋒。

雖然建制派已佔絕對優勢，但據聞政制局仍相當騰雞，連日嚟逐個建制派打奪命追魂call，尤其係啲喺聖誕新年假期去咗外遊嘅委員，確保佢哋冇受歐洲暴風雪影響，趕得切返港出席今早嘅首次會議投票選主席。睇番秘書處尋日發出嘅預計出席名單，有五名泛民委員因事缺席會議，即係只會有八名泛民開到會，當局根本唔使咁緊張。

有建制派仲指出，政府成日玩「狼來了」，喺冇需要嘅情況下叫建制派冧友，久而久之佢哋亦放鬆晒防備，把口就答政府定會準時開會，實際就成日遲到早退玩失蹤。尤其當局要委員會喺指定限期內完成審議，隨時禮拜六日同平日夜晚都要加班開會，依家報咗名嘅建制派到時有幾多人現身，真係冇人可以寫包單。如果因為咁樣畀泛民成功突襲到，建制派同政府都要孭鑊！