電子廢物成災 政府拖得就拖

聽講香港人平均每十八個月換一次手機，電腦亦換得好快，無他嘅，科技一日千里，產品日新月異，幾個月前仲係潮物，幾個月後就加入電子廢物行列。難怪有人話，香港好快會變成電子廢物製造廠。

其實，香港多年嚟一直喺度製造電子廢物，不過以前問題冇咁突出，因為祖國國土遼闊，多多電子廢物都唔愁冇出路。當時內地經濟啱啱起步，進口電子廢物係不可多得嘅財路。汕頭市有個鎮專門入口香港廢線路板，運番嚟就一把火將塑膠燒光，剩低銅同金等貴金屬。線路板含銅量有一巴仙咁多，含金量亦唔低，難怪當地人賺到笑。不過啲錢都唔容易賺㗎，燒起嚟方圓幾公里惡臭難聞，污染環境不特止，仲會致癌，都咪話冇有怕。

當時內地窮，民眾搵兩餐唔容易，當局惟有隻眼開隻眼閉。家陣就冇呢支歌仔唱嘞，國家富有咗，潮流又興環保，內地明年一月一日起實施新法規，禁止電子廢物入口。

咁就玩謝香港回收業界嘞。本港每年有五萬公噸電子廢物出口內地，內地一閂大門，電子廢物無出路，肯定逼爆新界回收場。環保團體促請政府盡快立法銜接內地新例，否則新界分分鐘淪為電子廢物堆填區。

講真，家陣搞到要臨急抱佛腳，都係多得港府後知後覺。今次內地呢條新例○八年八月已經通過，本港環保團體同立法會議員一早就提醒港府未雨綢繆，可惜環境局局長邱騰華等高官裝聾扮啞，拖得就拖。

要解決呢個問題，話易唔易，話難唔難，最緊要係有心。正如有環保團體話齋，全球已有近四十個國家同地區實施電子廢物生產者責任制，旨在妥善回收處理電子廢物，減少對環境嘅傷害。

乜嘢叫做電子廢物生產者責任制呢？簡單嚟講，就係邊個製造電子廢物，就邊個出錢處理。以台灣為例，當地有唔少處理電子廢物工廠，生意唔錯㗎，平均處理兩萬部電腦，就可以獲取一公斤黃金、一公斤半純銀、三千五百公斤銅，既保護環境又回收貴重物資，實在功德無量。不過回收成本都幾高，回收企業往往會蝕本，政府就向電腦生產商收費補貼業界。呢種責任制合情合理又可行。好多人都建議港府借鑑台灣經驗，可惜邱騰華借咗聾耳陳對耳。

以前拖吓仲冇問題，家陣再拖就唔掂嘞。有數計㗎，香港每年回收嘅六萬幾公噸電子廢物，以前八成運咗去內地，家陣如果都喺本地處理，仲邊有地方擺呀？

港府成日話發展乜港物港，其他港成唔成功冇人知，如果政府仲唔嗲唔吊，電子廢物港好快就會出現。叮佢個鎯鎯！