政情：建仔靠鄧麗君籌千萬
為咗紀念歌星鄧麗君逝世十五周年，建仔協辦音樂劇《愛上鄧麗君》，副主席阿Ann蔣麗芸尋日同埋一班音樂劇台前幕後人員出嚟同大家打招呼。音樂劇嘅製作班底強勁，除有內地著名音樂劇製作人李盾、電影《色戒》編劇王蕙玲外，兩位女主角分別係有「小鄧麗君」之稱嘅李爍，同埋「全世界尋找鄧麗君傳人」冠軍王靜。
阿Ann話早前喺北京睇過音樂劇排練，一聽到李爍唱歌就大受感動，兩位女角尋日亦有即場演繹鄧麗君嘅名曲《月亮代表我的心》同《小城故事》等。
呢齣音樂劇喺今年年底開始至明年一月八號公演，阿Ann話佢哋以友情價包起咗今個月三十號嗰場嘅所有門票，並已籌到一千萬咁多！所謂有華人嘅地方就有鄧麗君嘅歌聲，拍住齣劇籌款當然掂啦！
有「小鄧麗君」之稱嘅李爍無論外形、聲線，都充滿鄧麗君嘅韻味。
音樂劇另一位女主角王靜，係「全世界尋找鄧麗君傳人」冠軍。