政情：搞搞政：何鍾泰改口氹番鼠王芬

身兼西九新動力主席同專業會議成員嘅梁美芬（鼠王芬）早前透露，西九新動力內部開始討論組黨，其中一個考慮就係同專業會議合併，點知專業會議召集人何鍾泰一句「從未諗過」，打破鼠王芬嘅組黨夢。可能何鍾泰事後覺得自己太過口直心快，日前突然轉口風，話呢個世界乜嘢都有可能發生喎！唔知係咪想氹番鼠王芬呢？

專業會議共有四名立法會議員，除九龍西鼠王芬同嚟自工程界嘅何鍾泰外，仲有測量、建築及都市規劃界劉秀成同地產建造界石禮謙，三位「襄王」早喺泛聯盟年代已經以鬆散聯盟形式合作，無拘無束，依家「神女」鼠王芬突提出組黨，真係考起何鍾泰。

講完「從未諗過」後一個禮拜，何鍾泰對組黨口風轉軟咗，話其實早喺上屆立法會，泛聯盟都有研究組黨，只係泛聯盟喺立法會換屆後解散，組黨研究先至擱置，所以，專業會議同西九新動力唔係冇可能結盟，只係冇時間表咁話。正所謂「說話留一線，日後好相見」，何鍾泰睇嚟忽然明白呢個道理。