政情：阿陶麻煩事多頭都白

爆出社民連「維園阿哥」任亮憲非禮及強姦案後，進一步深化黨嘅內訌，火頭處處，啱啱先熬過倒閣風波嘅社民連主席陶君行成為磨心，尋日佢去遊行示威時，更發現佢頭髮花白，面容憔悴。

任亮憲一直向外宣稱自己跌咗電話，只係肯將個新冧巴畀佢嘅身邊人，而喺外界怒插阿陶唔主動向任提供協助之時，原來阿陶打鑼都搵唔到佢，唔頭痕就假啦。

老實講，阿陶嘅主席路都好顛簸。社民連月前因地區成立支部同是否參與泛民選舉協調機制問題而內訌，任亮憲同「滷味男」錢偉洛等人更發起倒閣行動。雖然「陶內閣」未被推翻，但足以令佢哋元氣大傷，秘書長季詩傑更因而退黨。其後又陸續爆出阿陶去夜總會新花都「跳舞」嘅傳言，負面新聞此起彼落，聽講阿陶仲灰到向朋友訴苦：「究竟我做錯啲乜？」

尋日問阿陶係咪做到心力交瘁，佢似乎表現得有啲靦腆，但話任亮憲終於覆佢機，指自己已搵到律師，叫佢唔使擔心喎。