政情：哪吒讚嫻姐影射富貴黨
退出富貴黨一個月嘅「哪吒」方國珊，至今未有新歸宿，前日喺沙田馬場撞到佢，問起對加盟其他政黨有決定未，佢表現得一啲都唔着緊。
據傳主因哪吒多年備戰二○一二年參選新界東，但田北辰退黨，令情況有變，富貴黨前主席田北俊部署再戰新東，所以令佢憤而出走。哪吒前日話，依家政壇「將多兵少，個個都係皇帝」，又指政壇年輕力量太細，真係好佩服工聯會「嫻姐」陳婉嫻能夠讓賢，○八年排名單第二名參選，畀新人當選。聽落哪吒話中有話，直情係影射緊富貴黨啦！
哪吒強調並非針對某政黨，只係講緊成個政壇現象，又話自己依家傾向同經濟動力同建仔等政黨先合作吓，互相摸索，慢慢再講加盟嘅事。哪吒本來係被力捧嘅第二梯隊，又難怪佢對新人難出頭問題咁大感慨嘅。