政情：白鴿區選勝負鐵頭仁押上人頭

政改方案通過後，政壇光譜大洗牌，最終邊個黨贏邊個黨輸，到出年年底區議會選舉結束自有分曉。但因政改而加劇內部分歧嘅白鴿黨點先算「贏」？到依家都仲係一個謎。

早前包括白鴿黨改革派另起爐灶嘅新民主同盟成員在內嘅三十人集體退黨，當中有七名新界東嘅區議員，成為少壯派出走嘅最大退黨潮，亦對該黨嘅地區工作造成嚴重打擊。黨主席鐵頭仁尋日喺大氣電波話，黨友來來去去邊個都控制唔到，佢會尊重大家嘅決定，但唔承認呢個係支持政改嘅沉重代價，仲話新民主同盟一班朋友，可以「離家出走」後試吓為組織做決策，到時就會明白做當家嗰種痛苦，唔會下下都賴大佬文化。

堅持談判路線正確

雖然退黨人數唔少，但鐵頭仁堅持當日行談判路線係正確決定，又指市民眼睛雪亮，如果佢哋係不滿白鴿黨喺政改嘅立場，「絕對會喺選票上反映出嚟」，加上政改係一個大是大非嘅問題，所以只要市民有所不滿，就唔止係流失一、兩席咁簡單。

鐵頭仁講到興起，鐵齒承諾如果到時選舉結果清楚顯示白鴿黨已「輸」，佢會承擔所有責任，就算「人頭落地」都在所不惜，仲笑言當日以超高票連任黨主席，係因為大家都希望佢留番喺度，承受後政改時代嘅選舉結果喎。咁即係如區選有乜差池，就等佢「人頭落地」作為問責，如果係咁，佢隨時要搵個頸箍保命喎！

咁輸幾多先為之輸？鐵頭仁冇講清楚，所以最終項上人頭點先叫保得住，都係一個謎。先以下年區議會選舉嚟計，○七年白鴿黨攞到六十個區選會議席，但未到選舉，就已經得番五十三個，如果出年有兩、三區唔生性，最終得五十個位落袋，咁白鴿黨算係輸十席定係輸三席？鐵頭仁個主席位保唔保得住，就要睇到時大家點拗數嘞！