冒牌藥物賣通街 打擊不力益奸商

講起賣假藥，好多人都會諗起以前嗰啲江湖郎中，佢哋把嘴仲滑過油，將啲藥講到天上有地下無，有時仲失驚無神塞隻曱甴入口，喺地下碌嚟碌去，跟住食番粒藥丸，哈，藥到病除！之不過，嗰啲所謂靈丹妙藥九成係流嘢，唔食死人算好彩。

今時今日，香港雖然已經冇江湖郎中，但係假藥仲係賣通街。今年海關一共檢獲五萬五千件冒牌西藥及中成藥，有假止咳丸，有假偉哥，總之乜都有。

呢啲從外地流入嘅假藥包裝同真貨相近，幾乎以假亂真，但價錢就比真貨平，買得多嘅仲有折頭添，所以好多市民都中招。近排天氣時冷時熱，隨時會感親，好多人都自己買藥食，講唔埋食咗假藥仲矇查查。

咁就弊傢伙嘞，呢啲假藥好多根本冇藥效，有啲雖然有藥效，但被污染過，食落肚輕則延誤救治，重則食死人。咪以為太一叮靠嚇，呢，近年周不時有假壯陽藥流入本港，因為價錢平，吸引咗好多想重振雄風嘅長者。有長者食後發高燒，其中有人送院不治。有位阿伯雖然執番條命，但係變咗「不倒翁」，連屋企都唔敢出，你話幾尷尬。

眼見假藥危害市民，海關推出三招：同消委會合作定期公布賣假藥店舖名單；向律政司人員提供訓練，加強檢控賣假藥奸商；同大學及科研機構合作加強對藥物嘅化驗。呢幾招唔係唔好，止唔止到咳就難講嘞。仲有，除咗第一招有時間表外，其餘兩招都仲係齋噏，搞得嚟，蚊都瞓，蛇都死啦。

話時話，明知賣假藥要坐監，點解仲有咁多人以身試法嘅呢？無他嘅，俗語有話，「十個打家劫舍嘅，都不如一個賣藥嘅」，可見賣藥利潤幾豐厚，賣假藥更加係暴利。有錢能使鬼推磨，奸商梗係搏到盡啦。治亂世用重典，加重刑罰先至可以將奸商趕盡殺絕。

近年海關拉咗好多賣假藥疑犯，今年頭十一個月就拘捕咗三十七人。照理應該可以打擊吓奸商嘅氣燄啦。可惜當局執法不嚴，有法不依。本來法例規定，販賣同管有假藥，最高刑罰監禁五年、罰款五十萬。但到依家為止，定罪案件最長只監禁兩年，最高罰款二十萬。其餘多數案件都係罰一萬幾千就算數，對奸商嚟講，只係九牛一毛，邊度有阻嚇力呀。

唉，食衞局局長周一嶽等人一日到黑吹水唔抹嘴，一陣話構建中藥港，一陣又話發展醫療產業，點知搞嚟搞去，搞出個假藥之都，你話死唔死？仲有噃，假藥會食死人㗎，如果當局仲唔嗲唔吊，分分鐘整鑊杰撻撻嘅，到時睇吓班高官點收科。叮佢個鎯鎯！