政情：迪士尼總裁搵家人撐場

有人話做嗰行厭嗰行，不過，香港迪士尼樂園行政總裁金民豪（Andrew）就唔係，反而成家人都係迪士尼捧場客，平日不時會舉家入場玩，近幾年家人生日更會喺樂園內度過，好似早前先同囝囝喺樂園過完生日，上個星期又輪到同囡囡Caitlin慶祝十歲生日。

Andrew話，Caitlin最鍾意小熊維尼，不過呢隻小熊舊年已經參加咗小妹妹嘅生日派對，今年嚟到賀嘅係最愛幻想嘅愛麗絲同白兔先生，呢兩位卡通人物啱啱喺香港新登場冇幾耐，梗係要把握時間影多幾張靚相，兩父女笑起上嚟成個餅印，連嬌俏的愛麗絲都失色。

公事繁忙嘅Andrew平日冇乜時間陪仔女，所以有機會就做到足，好似今次，佢就同Caitlin一齊親手製作紳士帽，然後即場戴上影相，最後仲向囡囡送上故事書及Duffy熊做生日禮物，氹到囡囡好開心。