政情：小科學家諗奶茶高科技
商務及經濟發展局局長劉吳惠蘭（Rita）同今屆金茶王羅德有個奶茶約會。啱啱過去嘅聖誕節前，Rita請咗幾位小科學家去茶王工作嘅茶餐廳，包括科大星之子陳易希、今年嘅「明天小小科學家獎勵計劃」一等獎得主聖保祿學校中七生楊穎琪、喺協恩中學讀中五時獲同一計劃三等獎嘅連珮珩，以及利用藍綠藻厭氧光合作用提供光合氫發電嘅迦密柏雨中七生陳凱誼等，一齊去飲奶茶。歎完奶茶後，班小科學家都忽然有橋，想發明啲同奶茶有關嘅嘢，譬如沖奶茶機、利用沖完奶茶嘅茶葉嚟發電等。
Rita希望科研新一代從奶茶創製過程，領會無數嘗試與堅持係科研不可或缺嘅精神，並且得到啟發。
劉吳惠蘭（右二）與陳易希（右三）等小科學家，觀摩金茶王沖製奶茶。 （政府新聞網圖片）