政情:政府唔知醜想申辦世盃

政府好想申亞,即使有強大反對聲音,都想照闖立法會,一波未平,港府中人竟然想再下一城,忽發奇想咁拋出「申辦世界盃好唔好」嘅議題。

有建制派立法會議員透露,港府申亞嘅拉票攻勢臨近聖誕前已全面煞停,似乎死咗條心,不過,港府中人似乎開始諗緊世界盃,只係申辦世界盃要以國家為單位,如果香港要搞,睇怕要夾埋珠三角城市先得。只係呢個偉大構思雖然可以博得好多球迷掌聲,但小小香港啃唔啃得起都係問題。

事關舉辦世界盃至少要有十二個標準足球場,其中舉辦大賽嘅球場要能容納八萬名入場球迷,其他分組賽球場亦須容納四萬人,香港大球場啱啱夠資格靠邊站辦分組賽啫。更何況,啱啱攞咗主辦權嘅卡塔爾預算要花六百億元……美金呀,香港攞唔攞得出呀?所以話,舉辦世盃呢頂帽,香港係咪戴得落,真係要計清楚,費事再次出醜喇!