政情:搞搞政:小百合遊埠 怕咗維園阿哥?

「維園阿哥」任亮憲被指涉強姦、非禮,事件喺政圈刮起桃色風暴,一眾「黨花」人人自危下,已曝光或被傳同維園阿哥有關嘅小花更成為追訪目標,好似無辜捲入任亮憲醜聞嘅「民主黨小百合」鄭莉莉,本來係上月正式成立嘅白鴿青年軍「民主青年」成員,尋日組織舉行活動,就唔見小百合出現。據黨友解釋,佢去咗旅行,時間之巧合真係好難令人相信同桃色風暴無關囉。

政黨新秀私生活備受關注之際,民主青年主席莫兆麟尋日講到佢哋嘅活動,都自爆上星期五到醫院探華叔時,被華叔訓示,華叔話,對民主青年嘅成立感到好欣慰,但同時提醒呢班白鴿青年軍要「紮紮實實」、「唔好好高騖遠」,似乎意有所指。不過,問到黨高層有冇提醒青年軍注意時,莫兆麟就話,任亮憲事件發生以來,白鴿黨高層並冇向佢哋作任何「提醒」,而佢哋一向好踏實,唔會出事喎。