政情：阿人淡出妻起錨 職工盟改朝換代

職工盟崛起多年，會內人事架構超穩定，就快二○一一年，職工盟有望告別李家時代，呢個李家即係立法會議員兼職工盟秘書長李卓人，事關擔任職工盟總幹事十四年嘅阿人老婆鄧燕娥已經辭咗職，佢同老公阿人喺職工盟掌舵約二十年，依家佢哋一個忙立法會，一個又辭職，可算逐漸淡出工會，所以職工盟都急急招聘總幹事，仲訂於後日截止添。

曾爆用人唯親家醜

九○年成立嘅職工盟早已成本港第二大工會，鄧燕娥透露，阿人九六年卸任總幹事後，佢就接棒，從此孭住工會嘅困身工作，係時候試吓其他嘢，唔講唔知，佢同老公喺職工盟揸莊嘅歲月足足有成二十年咁多。

記得舊年暑假期間，職工盟嘅屬會已傳內訌，當時屬會之一、建築地盤總會嘅理事就質疑職工盟領導層用人唯親，話阿人、佢太太甚至姨仔都喺職工盟身居要職，據講件事最後仲搞到去廉署舉報添。當時冇咗下文，事隔年多，鄧燕娥就急流勇退，兩件事有冇關係真係局中人至知嘞。

據鄧燕娥話，佢八二年讀完書後就投身勞工界，成日要隨傳隨到，冇晒私人時間，好幾年都冇放過長假，所以想全身而退，趁退休前試吓新挑戰。至於係咩新挑戰，佢就未決定。阿人就話，支持老婆嘅決定，等佢可以抖吓，至於老婆多咗時間留响屋企會唔會多咗摩擦？佢就話應該唔會，因為彼此喺屋企都盡量唔傾公事。

職工盟已經成立咗個五人遴選委員會負責揀蟀，其中一名成員李建賢話，至今只係收到五個申請，外界同內部都有，由於個職位管好多嘢，人工都幾高吓。佢希望有多啲人申請，等委員會揀到合適人選。