巴士安全響警號 官府監管咪遲到

開門飛車睇戲就見得多，估唔到驚險鏡頭竟然喺香港鬧市上演，仲要係坐滿乘客嘅巴士添，呢一幕咁刺激睇怕連荷里活大導演都要寫個服字。

聖誕節當日有位七旬老翁同太太喺中環堅道搭巴士去灣仔會展睇冬日美食嘉年華，美食未嘗到，已經冇咗兩隻門牙。話說兩人上咗一架城巴，下層座無虛席，惟有上上層。點知車長連中門都未關就突然開車，老翁失重心碌落樓梯，再由車門跌落路邊，門牙飛脫，成面披血，昏迷送院。

肇事司機事發後已被停職，城巴回應指涉事巴士月初至做過例行檢驗，又話每架車司機位旁邊都有燈號提醒車門有冇關。專家話巴士乘客被拋出車外相當罕見，懷疑涉及人為疏忽，有人冇睇警示燈號就開車。

查實，巴士車齡愈短，發生同類事故機會愈微。部分車齡十年內嘅巴士，除咗警示燈號，仲加設警報，車門未關會發出聲響提醒車長。車齡七年內嘅巴士更安全，如果車門未關好就開動巴士，車輪會自動鎖住唔行得。

涉嫌「中門大開」嘅巴士車齡十二年，只有司機位錶板警示燈提示未關車門，如果車長開車冇留意燈號，隨時會好大鑊。一架巴士乘客數以百計，高峰時間逼到爆，萬一重演開門飛車，後果不堪設想。呢次老翁好彩只係撞甩牙，下次分分鐘會死人。

叮！未關門就開車明顯係巴士安全嘅大隱患，全港車齡超過十年嘅巴士唔係細數，防患未然政府責無旁貸。正如有立法會議員話齋，除咗提醒司機必須關上車門至開車，運輸署、機電工程署同巴士公司要及早查明事故原因，提出具體解決方法。

人命關天唔講得笑，至怕官老爺做嘢唔嗲唔吊。乘客喺巴士車廂、或落車時失平衡跌倒受傷甚至死亡嘅個案，○七年至○九年每年都有六百幾宗，平均每日有一點八宗。

有民間團體舊年已經就巴士車廂設備不足可能引起嘅危險，向運輸署提出二十五項建議，但署方睬你都多餘，一條都冇接納，淨係叫乘客小心搭巴士。呢次仲大劑，乘客唔止喺車廂仆倒，仲碌埋出馬路，問你驚未！

仲有，巴士超速導致死亡意外時有發生，令人質疑車上嘅限速器有冇作用。本報曾踢爆，巴士限速器原來唔係好似小巴限速器咁被列作法定裝置，運輸署咁多年從未抽查過，只係靠巴士公司自我監管。喺輿論窮追猛打下，署方至決定今年內抽查巴士限速器。

巴士安全響警號，官府監管咪遲到。每日有三百幾萬人次乘搭嘅巴士危機四伏，港府唔能夠再側側膊，如果搞出人命，太一叮一定會叮爆運輸署個鎯鎯！