SUN世代:躋身F1難過做太空人

視冼拿為偶像的李英健，對於未能躋身F1一級方程式，引為人生憾事。原來○五年他曾加盟前F1米納迪車隊成為試車手，可惜始終未能正式成為隊員：「F1一年只有二十二隊車，即係全球只有二十二人可以參賽，競爭比做太空人更大，我諗全世界一年都唔止淨係訓練二十二個太空人啩！真係要講天時地利人和。」

貴為香港賽車壇天之驕子，Marchy也為政府冷待賽車而動氣：「喺政府零支持、又冇賽場之下，香港連業餘賽車手嘅水準都好高，真係好神奇！我對政府已經死心，只希望政府唔好再誤導公眾，令人對賽車有負面印象，賽車其實係好安全同專業嘅運動！」

香港的教育制度同樣令他看不過眼，做了爸爸後體會更深：「香港小朋友好慘，要補習啦，又要學呢樣學嗰樣，同其他人競爭！讀書固然係好，但小朋友若有其他天分，家長更加應該鼓勵同支持，唔應該一句得埋嚟，認為搵唔到食，就唔畀佢哋發展。」