政情：黃偉綸偕魯恭遊蘇梅
喺前日嘅聖誕節，國際著名小提琴家姚珏再踏上演奏舞台，舉行一連三場嘅「姚珏All About Love全為愛音樂會」，佢丈夫魯恭親臨撐場外，同魯恭相識多時嘅新聞處處長黃偉綸兩公婆都畀面到場欣賞。原來魯恭同黃偉綸私交甚篤，佢哋喺高爾夫球場上認識，由波友慢慢變成老友。
問黃偉綸今個聖誕節同新年會否外遊，佢話聽日就會同魯恭等幾個家庭出發去蘇梅島旅行，過番個熱辣辣嘅假期，享受陽光與海灘，好好地hea番幾日抖吓喎！至於點解揀公眾假期後出發，佢笑笑口咁話：「魯太姚珏嘅音樂會喺廿七號先至完成演出，所以咪廿八號出發囉！」
除黃偉綸外，港區全國人大代表馬逢國、立法會議員林健鋒、貿易發展局總裁林天福同滙豐亞太區行政總裁王冬勝都有捧場。
黃偉綸夫婦（圖）將會同魯恭夫婦去蘇梅島度假，享受熱辣辣嘅假期。
王冬勝（中）、林健鋒（右）嚟捧場，魯恭（左）親自接待。