政情：星屑醫生單拖過聖誕

前晚香港西醫工會舉行聖誕派對「歌舞昇平聖誕夜」，擔任司儀嘅係工會會董兼同「維園阿哥」任亮憲老友鬼鬼嘅「星屑醫生」歐陽英傑。平時佢打扮新潮，但當晚就搖身一變着到官仔骨骨，加上風趣幽默嘅談吐，令個派對生色不少。

星屑話做司儀係即興演出，認為即興可以做得更活潑。佢一身深色嘅西裝，令到佢個綠色四葉草心口針顯得更加搶眼，佢話個心口針其實係佢送畀老婆嘅禮物，但前晚見好襯套西裝，所以特登借嚟戴吓。呢個心口針係由水晶鑲嵌而成，好閃，起咗畫龍點睛嘅效果。

睇咗成晚，硬係唔見星屑個老婆，做乜咁衰撇低老婆去派對先？星屑笑住澄清，原來老婆同家人去咗旅行，得番佢一個喺香港，所以先被迫單刀赴會。星屑嘅衣着其實一直都好前衞，例如佢會着住短褲加legging喺診所幫病人睇病，而前晚又係另一個造型，唔怪得佢叫自己做「花樣醫生」啦。