政情：搞搞政：德成局長申亞申上腦

民政事務局局長曾德成尋日發表《局長隨筆》，緬懷過去一年令人難忘同感動嘅事。佢話香港人今年印象最深刻嘅係港隊單車選手黃蘊瑤忍住裂肋骨嘅傷痛，爬番起身負傷應戰，最終得到銀牌嗰一幕。佢愈講愈興奮，話體育競賽可以將一個人同團隊，甚至一個地方嘅精神，好似火光咁迸發出嚟，進而對人心造成更大嘅激勵，形成難以估計嘅力量。

成篇文足足用咗三段去講亞運，其餘大約兩段篇幅就涵蓋咗兩位彰顯無私大愛、去到內地做義工但不幸喪生嘅港人義工黃福榮、曾敏傑，同埋菲律賓人質事件等等真正嘅大事。德成局長話菲律賓人質事件發生後，香港人表現出團結同理性，呢啲情況同樣令佢感動咁話。

睇到呢度，相信大家都明白德成局長想講乜啦，重重複複原來又係力撐政府申辦二○二三年亞運，可以話毫無新意。申亞流產根本已成定局，政府仍然死心不息爭取支持，喺德成局長眼中，唔通除咗亞運之外，真係冇嘢再值得佢關心？

民政事務局嘅工作絕對唔只體育，德成局長喺回顧今年感動事件嘅網誌尾聲又再次用「體育」行頭，到底呢位年薪三百幾萬嘅局長，今年全年做咗幾多嘢呢？