政情：玩劍十戰九敗鬍鬚曾露底

呢排財政預算案做緊諮詢，但財爺鬍鬚曾唔係喺度諗計去紓解民困，竟然仲懶悠閒咁喺網誌寫佢玩西洋劍嘅心得。佢大講幾十年嚟嘅玩劍史之餘，仲露晒底，話玩劍往績即使十戰九敗，如果喺關鍵時刻果敢出劍，都有機會反敗為勝喎。玩劍尚且如此，諗深一層，鬍鬚曾嘅政績又何嘗唔係十戰九敗呢？

近年樓價狂飆，唔單止豪宅，就連平平實實嘅中小型住宅都畀炒家炒到飛起，市民個個哭訴上唔到樓，各黨派更難得地槍口一致對外，促請政府復建居屋。雖然鬍鬚曾喺今年多次出招壓抑樓市，但所出嘅卻全屬虛招，完全無助樓市降溫，難得佢依然自我陶醉，聲言樓市已經受控，最後就連佢嘅下屬金管局總裁陳德霖都睇唔過眼，喺十一月初嘅財經事務委員會同佢唱反調，踢爆佢錯估形勢，搞到佢極為面懵。

唔敢出劍紓民困

鬍鬚曾其後喺十一月尾再出「狠招」壓抑短期炒風，包括開徵額外印花稅，又進一步收緊按揭成數。雖然今次出招的確令樓市成交量大為縮減，但同時造成唔少副作用—大批地產經紀擔心失業，真正買家亦無辜被牽連。呢次出招嘅真正成效唔知能否維持，但至少社會大批「N無」人士依然未能受惠，上樓繼續遙遙無期。

其實唔單止樓市問題未解決，鬍鬚曾面對殺到埋身嘅通脹同拖拖拉拉多年嘅港台合作等問題，一樣無甚建樹。佢喺網誌上自言，即使實力低於對手，往績十戰九敗，如果把握嗰一勝嘅機會，喺決戰一刻果敢出劍，都未必唔可以取勝。

之不過，最後一擊可勝亦可敗，鬍鬚曾嚟緊最大嘅job就係明年二月公布新一份財政預算案，且看屆時佢能否「果敢出劍」紓民困，若果又係冇料到，喺庫房水浸下繼續做其孤寒財主，㩒住荷包唔肯放水，咁佢肯定十戰十敗嘞！