盛事多多益善 只怕鋪鋪爛尾

可能畀北京奧運、上海世博同廣州亞運撩起鋪癮，港府近排對辦盛事鬼咁積極，體育、文化、音樂、藝術瓣瓣都想掂，申辦亞運嫌未夠，又諗住搞番個「亞洲版艾美獎」，玩埋「亞洲版奧斯卡」睇怕亦只係時間問題。

呢，明年三月底本港會首次舉辦兩項亞洲盛事，包括亞洲「彩虹獎」電視頒獎禮及香港亞洲流行音樂節。港府話，會撥過千萬元公帑，資助主辦單位邀請中港台同日韓等地電視業界及歌手來港「打擂台」，藉機會表揚亞洲區優秀電視人才同作品，促進區內同業及音樂人交流喎。

「彩虹獎」其中一個主辦單位負責人話，盛事已獲得星馬泰、日韓、內地、越南同印度等國家與地區媒體嘅支持，有信心將頒獎禮打造成「亞洲版艾美獎」。

講真，係人都唔想香港畀人叫「文化藝術沙漠」啦！如果資助一千幾百萬辦盛事真係可以提高業界水準，促進本港電視同音樂發展嘅，市民梗係覺得多多益善，仲舉埋腳贊成添。

叮！怕就怕當局只係出於好大喜功，純粹為辦而辦，撥咗款就貴客自理，既冇長遠規劃，又冇細節跟進，到頭來搞到唔湯唔水，主辦單位、獲邀嘉賓同本港電視迷及歌迷谷到一肚氣，陷入「三輸」局面，咁就該煨咯。

話時話吖 ，港府搞大型活動衰「爛尾」，例子多到唔使恨。舉個最典型例子，○三年沙士襲港，當局為振興經濟，斥巨資贊助美國商會主辦「維港巨星匯」，因為推廣不力，監管失職，門票滯銷，送都冇人吼，甚至有歌星辭演。過億元投資到頭來得個大頭佛，有關官員差啲人頭落地，搞到要同當局對簿公堂。

使過億元資助「維港巨星匯」就鬼咁疏爽，出些少錢扶持吓創意工業，港府講一套做一套，不情不願。本港創作人林氏兄弟舊年嘅互動短片《宅男最後的120小時》，前排喺瑞士電影節成功入圍最後九強，主辦當局希望創作者可以去當地參展及交流。由於費用不菲，兩兄弟先後向藝發局同政府申請資助，都不得要領，有官員仲話短片「與香港無關」。事件被傳媒曝光，行程資助至獲解決。

港府推動文化藝術發展只講功利，唔睇長遠。資助大型活動只會優先考慮有冇機會博到掌聲，對本港文化藝術發展既冇承擔，又冇規劃。咪話太一叮唔提醒吖 ，如果當局又係虎頭蛇尾，「亞洲版艾美獎」遲早會變「香港版包尾獎」嘅咋。叮！