Sun世代：印刷起革命 全靠學生哥
很多人認為印刷業已式微，偏偏就有一個印刷門外漢用成績告訴大家，在香港，搞印刷、噴畫一樣賺到錢！傅備斌正因為乜都唔識，反而能站在用家角度睇通行內弊端，憑着明碼實價、二十四小時起貨和「大小通殺」，成功令夕陽行業絕境翻生，更為他帶來「亞太企業家大獎」等多項榮譽。
由○三年開業的BannerSHOP，是名副其實的「香港製造」，門市和廠房都設在香港。現時有十間門市，遠至澳洲、歐美也有合作夥伴。去年榮獲「中華傑出商業領袖」及「亞太企業家大獎」的執行總監傅備斌深信「只有夕陽的公司，沒有夕陽的行業」。傅備斌經營過很多不同類型的生意，都以失敗告終，直到二○○○年和拍檔搞禮品公司，有客人要求他們代製易拉架和Banner，令他靈機一觸：「香港印刷業原來好封閉，定單小唔接，交貨期唔夠快，又冇明碼實價，如果改革一下，呢行其實有好大發展空間。」
十幾蚊生意都接
他和兩位拍檔都是門外漢，卻膽粗粗搞起這盤生意來。開業前，三人輪流向內地印刷廠取經，生吞硬記每個印刷程序。第一間門市選址觀塘工業區，只有一部噴畫機，所有事情都一腳踢：「我哋賣廣告，將價目表一清二楚列出嚟，仲首創二十四小時起貨。」更重要的是絕不嫌棄散客：「以前起碼要印幾百蚊先有公司肯接，但我哋十幾蚊嘅生意都接，而且價錢平到好多客都唔信！」
這些「濕濕碎」的生意，累積起來便是可觀的收入：「好多學生哥，幫襯過之後不斷喺網上讚，又介紹更多同學嚟幫襯，好快就做起口碑！BannerSHOP成功，最大原因就係靠呢班散客！」現時平均每日接五百多張定單，每張定單由二十多元到數千元不等，近年更開拓婚禮舞台布置的生意。發展至今，噴畫機已有三十多部，員工過百人，更引入價值五百多萬元、全球最新型的環保噴畫機：「環保肯定係未來潮流，引入環保機器後，歐美、澳洲嘅定單，已佔總生意額五分之一。香港政府雖然冇立法，但希望由我哋做起，令印刷業走向環保。」
香港的舖租、人工樣樣貴，但傅備斌由始至終都堅持「香港製造」：「香港製造係信心保證，而且香港人乜都要快，如果將廠房設在內地，冇可能做到二十四小時起貨。」說到目標，他不假思索：「衝出香港，賣勻全世界，將『香港製造』宣傳開去！」
傅備斌小檔案
年齡：48歲
現職：BannerSHOP執行總監
家庭狀況：已婚，育有一子
威水史（部分）：
香港名牌2010
《資本才俊》非凡數碼噴畫服務大獎
盛世環保企業獎Prime Award2009
2009中華傑出商業領袖
亞太企業家大獎2009
第七屆香港數碼印刷大獎金獎及優異獎
第五屆盛世卓越品牌大獎
香港工業總會2008年香港青年工業家獎
傅備斌堅持「香港製造」，他身旁是「Banner Buddy」。
傅備斌（左）曾獲盛世環保企業大獎，以表揚其店推動環保印刷。 （受訪者提供）
原為印刷業門外漢的傅備斌，如今已成為業界翹楚。
BannerSHOP由○三年開業至今獲獎無數。