政情:華叔聖誕派對開香檳

白鴿黨元老、支聯會主席司徒華之前開到聲希望可以搞聖誕派對,佢班徒弟、朋友當然唔會令佢失望。雖然今晚先係平安夜,白鴿黨張文光、李永達、涂謹申,以及支聯會李卓人、蔡耀昌,同埋華叔屋企人一行二十幾人,尋日帶埋聖誕蛋糕、雪糕、朱古力同一堆小食去醫院同華叔提早賀聖誕。

喺短短半個鐘嘅聚會中,大家齊齊唱聖誕歌畀華叔聽,氹得佢好開心。華叔話今年嘅聖誕願望係身體健康,仲幫大家開香檳助興添!

張文形容華叔氣色唔錯,可以落床周圍行吓,做少少運動,但唔可以亂食嘢,所以就算開派對,都只係食咗啲蛋糕同朱古力。阿人將喺挪威出席諾貝爾和平獎頒獎禮時,收集多個民運人士簽名嘅T恤送畀華叔做聖誕禮物,令華叔愛不釋手;而當日佢哋喺挪威遊行時手持嘅火炬,都拎埋畀華叔睇。張文話華叔不停咁研究點先可以令火炬着火。

Money18 新功能「18好路數」為你預測心水股票升跌機會率

華叔話今年嘅聖誕願望係身體健康。 (資料圖片)