政情：搞搞政：田少派叉燒飯吸票

喺○八年立法會直選戰，富貴黨前正、副主席田北俊同「莎姐」周梁淑怡雙雙落敗，死穴就係地區工作不力，大量流失票源。田少承認過去偏重聯繫工商界，地區活動只派當區區議員撐場，犯上直選大忌，所以佢回歸富貴黨後，短期內都唔會對黨進行大手術，而係做「跑手」，跑勻港九新界，親身落區吸票，尤其母親節、中秋晚會同春茗團拜，「畀地區人士見你多啲，影吓相，陳太、李太都好，見你多咗囉，就化番做選票。」

佢重返黨擔任榮譽主席，頭炮係派叉燒飯。佢話喺沙田搵到間食肆以成本價贊助，歡迎區內嘅公公、婆婆免費入內進食，行動喺下月中分四日進行，每日一百五十個限額，即係派足六百碗叉燒飯，而田少、莎姐同主席劉健儀，四日裏面梗有一個會現身「陪客」。

派完叉燒飯之後，田少仲會擇日落港島，喺山頂搞寵物遊行，宣揚關愛動物訊息。山頂居民個個富貴，人人養貓狗，田少帶埋愛犬現身，顯然又係嚟吸票，實行為富貴黨明年區選重奪山頂地盤鋪路。田少呢鋪睇嚟想靠「兩條腿走路」撐住個黨喎！