政情：龔仁心無奈捐空頭支票

華懋慈善基金尋日搞咗個名為「慈善中國 和諧社會」嘅論壇，邀請咗幾位國內大慈善家，包括世貿房地產主席許榮茂同有「內地首善」之稱嘅陳光標即席分享行善嘅心得同好處，唔少政商界人士都有嚟撐場。

基金喺活動上向多個慈善團體捐贈支票，但主席龔仁心自嘲基金會依家官司纏身，唔可以動用存款，所以呢啲暫時只係空頭支票，佢睇住一大筆錢但係唔捐得，內心相當之唔好受；不過，佢知道中央政府同香港市民都好支持佢哋繼續行善，所以內心仍然係欣慰。佢承諾一旦官司解決，會即時捐出承諾嘅款項。

華懋集團前主席龔如心嘅遺產爭奪戰預計下月初再次開審，問到龔仁心會唔會覺得緊張，佢話：「冇緊張，我信天地有正氣！」佢仲透露，自己三個禮拜前曾經提議動用集團部分盈利行善，但最終畀一啲「以為自己有權」嘅人反對，所以暫時擱置咗，佢都覺得好可惜。