政情：肥亨推介睇武俠小說
第三屆香港聖誕書展尋日喺灣仔會展舊翼揭幕，擔任主禮嘉賓嘅教育局副局長陳維安話喺呢幾日聖誕長假中，消磨時間嘅最好選擇就係閱讀。唔知佢鍾意睇乜嘢書呢？
中策集團主席馬時亨都嚟撐場，佢話細個鍾意睇武俠小說，例如經典武俠小說《神雕俠侶》佢都睇過，佢奉勸後生仔唔好睇咁多電視，小說比電視更精彩。自從肥亨辭官後，依家有多啲時間睇書，佢話睇書會刺激頭腦，增加幻想空間，尤其係小說，意想不到嘅橋段吸引人一路追，好好玩。
書展由尋日起至三十號止，有逾七百家出版社同供應商參加，展出逾百萬本中英文圖書。主辦機構特登贊助一百位長者同一百位基層學童參觀，成為首批入場嘅嘉賓，每人除獲安排專車免費接送同提供免費午餐之外，更獲贈二百蚊書券，現場開心又熱鬧。
肥亨教人想買屋由讀書開始。