政情：一雞死 一雞鳴 經濟動力死撐申亞

向來被視為政府親密戰友嘅建仔，企硬反對香港申辦二○二三年亞運會，睇嚟政府嘅申亞大計，幾乎可以肯定以失敗告終。不過，正所謂「一雞死，一雞鳴」，大有機會取代建仔呢個親密戰友位置嘅，可能係經濟動力。

抄德成局長舊橋

點解咁講？經濟動力四名立法會議員對申亞嘅立場一直都好堅定，即使立法會民政事務委員會已通過反對申亞都好，都改變唔到佢哋支持申亞嘅決定。民政事務局局長曾德成多次擺運動員上枱，都軟化唔到反對申亞嘅建仔，明知係撼頭埋牆，經濟動力又用番德成局長嗰招，尋日搞咗個「香港體育發展座談會」，請到六位啱啱喺廣州亞運拎到獎牌嘅運動員嚟分享苦與樂，擺明又係想借運動員把口力撐申亞。到呢一刻仲唔肯放棄，出心出錢又出力搭台幫政府，咁都唔係新一代親密戰友？

佢哋嘅議員林健鋒（Jeffrey）講到明，雖然有人話申亞同推廣體育唔需要掛鈎，但兩者其實息息相關，而且二○二三年確係舉辦亞運嘅好時機，所以冇理由唔去做。

對於坊間有意見認為唔應該花錢搞亞運，應該做好扶貧工作後先好去諗，Jeffrey就顯得唔係太同意，佢認為社會唔同界別都有權獲分配一定嘅資源，既然體育界咁支持申亞，政府都有責任回應佢哋訴求。

民意反對佔多數

除咗班運動員外，體育學院主席李家祥尋日都開口支持申亞，佢話香港精英運動員嘅培訓已達世界級水平，現時全職運動員有成二百個，如果申亞嘅話，仲可以令精英運動員循明確嘅目標去訓練，成績更理想之餘，香港亦會有更均衡嘅發展。

依家仲死撐申亞又有乜用吖，一來好明顯大勢已去，二來以依家嘅政治形勢同民意嚟睇都係反對申亞佔多數，就算Jeffrey搭埋個台出嚟撐又點？最終申亞都係會冧台㗎啦，盞嘥氣！