狂發655則SMS示愛

【本報訊】 「甜美心詩，最難忘妳那可愛笑容，但願一世地愛護着妳、擁抱妳、親親妳……」、「亮亮誠心向天祈求，能與我一生最愛的美詩，共諧連理，永結同心……」……馬健亮向繆美詩所發的手機短訊，共六百五十五則，近一萬字，文中以「亮亮」自居，字裏行間夾雜「想攬吓妳、錫吓妳」的字眼。雖然他被判守行為一年，但仍對這段「感情」抱有希望！他說「我仍然好鍾意佢……以後會點？……隨緣啦！」

馬健亮昨日架上眼鏡、穿着深色衣服出庭，外表斯文，神情帶點緊張。聽判之後，他仍無悔自己的行為，只慨嘆自己「追女仔」搞到上法庭，有點不值：「我覺得判得重囉，又唔係嚴重罪案，梗係唔開心啦，追女仔追到上法庭。」

問他為何對繆美詩如此癡纏，他理直氣壯說：「鍾意就係鍾意，好難講喎，自己對於佢，係執着咗少少，但係因為我好鍾意佢。其實我係善意，只係想用時間去打動佢，精誠所至，金石為開……」

這位情癡向本報表示，他於九一年曾結婚，但在○三年離婚，無子女，現時單身，經營三間食肆，他大讚繆美詩當新聞女主播時，表現口齒伶俐，樣靚笑容又吸引。

○五年一月十五日他以商會代表身份與領匯開會，結識當時任職領匯傳訊企業代表的繆，更是一見鍾情：「我唔鍾意一腳踏兩船，一心一意追佢」，他送鮮花和發出示愛電郵，「佢初時都有覆我電郵，我以為佢會接受我，所以咪係咁追求佢囉！」

食肆以兩人星座命名

馬健亮並無後悔他自己所做的一切，但坦言有點不開心，「其實滋擾嘅定義好灰色，我只不過係噓寒問暖之嘛，我發短訊，又無寫猥瑣嘢，又無恐嚇佢……」一年多前，他在葵芳商場新開設一間食肆，名為「魚子飯館」，為甚麼叫「魚子」？靈感來自他及繆美詩的星座，「我係雙魚座，佢係雙子座，所以就叫魚子囉！」

問他會否再守候繆，他說：「隨緣啦。」但對這段「感情」仍抱希望：「我都係好鍾意佢，雖然依家發生咁嘅事，但我覺得仲有希望！」他又承認經此事後，以後追女仔都會有戒心，「又唔敢打電話，唔敢發短訊，好大壓力」！