Sun世代：少年食神從敗家到珍惜

人稱「少年食神」的林澄光（Michael），現時一身兼多職，在雜誌寫飲食專欄，又在電台、電視台做主持，變成每天只睡四小時的大忙人。他毫無怨言道：「機會轉瞬即逝，我好珍惜現在擁有的一切。」懂得珍惜，皆因他曾經浪費，將十八載青春當作剩菜殘羹，毫不吝嗇地拋進垃圾桶。

十八歲之前，Michael一直過着虛擲光陰的「敗家」生活：「我十四歲已經蒲disco、着潮衫、玩相機、買名牌。香港未有Dr. Martens賣嗰陣，我已經叫人喺英國訂返嚟。」十六歲那年，會考成績只得一分，他完全沒有為出路擔憂。勉強到商科學院讀了兩個月就「頂唔順」，索性放棄學業，「全職去玩」，一去就玩了兩年。回首前塵，他徐徐吐出這一句：「以前係……啲生活真係好敗家，真係好敗家！」

接管父業 感人情冷暖

好景不常，Michael父親因病過身，身為家中長子的他迫於無奈，惟有接管父親留下的建築公司生意，「開始知道咩叫人情冷暖」。期間更遇上「人生之中見過最邪惡的地盤經理」，經常被他無理挑剔及無故批評，令他碰壁碰到「損手爛腳」之餘，人生也跌落最低谷，「成日夜晚匿埋喊」。

Michael自小跟隨父親四出品嘗美食，「見識過好浮誇、窮奢極侈嘅飲食文化」，逐漸發現自己對飲食「有少少talent（天分）」。他說：「我知道咩叫好食，咩叫爭啲；我識得比較，將好食嘅嘢話畀大家聽，希望大家用最低價錢，換取最大享受。我有呢個使命感。既然有呢個天賦本錢，我樂意去做。」

他喜愛捐窿捐罅，介紹少人發掘的街坊美食：「我嘅食嘢態度係最緊要雅俗共賞。唔好三萬蚊一隻花膠、六萬蚊一碗翅咁；好多人搵緊四、五千蚊養一頭家喎，一個月只有千零蚊零用錢。但係如果你畀多六蚊，就可以食到有天淵之別嘅叉燒飯，咁我咪可以令到多啲人食到令人開心嘅叉燒飯囉。」

勉年輕人 趁早找方向

Michael工作多多，寫專欄、拍電視節目、開餐廳、玩賽車，總之無時停。每天凌晨三時回家，五時上床，早上九時起身，忙到每天只睡四小時。他毫無怨言，愈做愈起勁：「做人最緊要學懂珍惜，珍惜眼前人啦、珍惜自己嘅福分。我希望年輕人睇到我嘅經歷，趁後生試多啲鍾意做嘅嘢，或者喺年輕時搵到出路同埋方向，甚至畫出彩虹。」

林澄光 Michael's Profile

年齡：36歲

現職：飲食專欄作家、食評人、電台節目主持、電視節目主持（飲食、旅遊）

出版著作：《少年食神約會美食（香港篇）》、《少年食神系列：曼煮泰菜》、《秘．台灣隱世美食遊》