政情：菁英會聯歡鬥隊啤
菁英會喺啱啱嘅禮拜一（二十號）搞咗個聖誕聯歡晚會，喺灣仔皇朝會筵開十六席，除咗創會會長施榮忻（Jaime）同主席白富鴻呢兩位核心人物坐鎮外，仲有好多新血悉心打扮後現身。
今年Party一如去年舉行啤酒競飲大賽，去年榮登啤酒王嘅莊家彬（Albert）自然成為大熱，今年挑戰者係康泰太子爺黃進達（Jason），鬥快競飲兩大杯啤酒，結果Albert比Jason快一倍時間飲完，大熱蟬聯啤酒王寶座。之後又有「深喉」競飲啤酒大賽，Jaime再捐出一萬蚊做壓軸大抽獎。
莊家彬（左）蟬聯啤酒王寶座。
施榮忻（右）同楊華勇（左）喺「深喉」競飲啤酒環節中雙雙勝出。
白富鴻（左三）同一班菁英會新血打成一片，包括黃進達（左一）、楊哲寧（左四）、黃仰芳（右四）、李世傑（右二）同林淑怡（右一）等。