政情：白鴿自救大合照示團結

白鴿黨上禮拜爆出三十人退黨嘅消息，身為副主席嘅卿姐尋日講到白鴿黨救亡大計，仲拋出兩個新招添。

包括七個沙田、西貢同大埔區區議員退黨後，白鴿黨新東勢力元氣大傷，不過卿姐尋日話，最近已密鑼緊鼓同新東四個地區黨團開會，沙田區黨團就決定，集合全部黨團成員影張大合照，做埋橫額掛通街，既可以同街坊拜個早年，又可以令市民知道佢哋有幾團結、服務團隊陣容有幾強大。其實，呢張新全家福只不過係話畀市民知，邊啲人已經唔係白鴿黨嘅人嘞，等大家睇清睇楚。

至於地區團隊士氣，佢就話都唔錯，有志參選區議會嘅黨員都積極落區，相信唔會影響部署，到現時為止亦未有黨員表示有興趣去狙擊退黨黨友。不過，卿姐就覺得白鴿黨嘅第二梯隊需要諗吓計增加曝光率，佢建議可去多啲「城市論壇」做觀眾發表吓意見，話唔定製造多個「維園阿哥」呢！