政情：潘佩璆踩入葉劉地盤
未來兩年有五個大型選舉，黨派已經密密部署。盛傳躍躍欲試落港島挑戰地區直選嘅工聯會立法會議員潘佩璆，就打算喺南區華富邨附近開第二個議員辦事處，務求多啲服務當區街坊。佢仲話，呢區基層同中產嘅分布平均，好多現任同退任嘅公務員。呢啲選民咪係新民黨主席葉劉淑儀嘅基本盤囉，唔通潘醫生想同葉劉拗手瓜﹖
潘醫生梗係唔會評論，只係話工會唔同政黨，會員冇咁大服從性。但佢認為自己既係專業人士，又代表工會聲音，相信都可以爭取到基層同中產支持。雖然工聯會未試過喺港島區直選，但佢哋計過條數，僅喺港島區就有七至八萬個會員，如果當中有一半出嚟投票，已經好和味。嚟緊工聯會計劃派多啲樁腳落港島參選區議會，潘醫生嘅算盤可能打得響o架。
潘佩璆準備殺入華富邨設立第二個議員辦事處，為下屆立會選舉鋪路。 （資料圖片）