政情：搞搞政：任總升呢教中大精英班

金管局前總裁任志剛卸任後，對金融界工作依然好上心，嚟緊佢又有新搞作，就係幫中大全球經濟及金融研究所嘅新課程「全球金融菁英領導研討班」做講師，呢個課程名副其實係五星級，事關為期五日嘅課程學費收成八萬蚊，認真唔講得笑，任總梗係星級教師之一啦。

咁昂貴嘅課程，學生係乜人呢？據全球經濟及金融研究所所長廖柏偉介紹，今次課程報名嘅學員嚟自多個唔同國家地區，預計收生人數只係三十人左右，而取錄條件之一係睇學員可唔可以為其他學員帶嚟助益，言下之意即係唔係有錢就有得讀。

咁有分量嘅學生，點少得有分量嘅教師呢？原來課程邀請三位諾貝爾經濟學獎得主、前證監會主席沈聯濤同廖柏偉等執教，另外仲有身兼中國金融學會執行副會長任志剛，同中大前校長、中投國際（香港）有限公司董事長劉遵義，教師陣容真係夠晒星光熠熠。