政情：肥根滯英體會難民心態

歐洲大風雪令多個機場癱瘓，倫敦希思路機場滯留大批港人港生。建仔立法會議員黃容根原來都係苦主，一度被迫滯留四日，令佢明白乜嘢叫難民心態﹗

肥根話，佢本月中同廣東省廳級官員一齊去英國、蘇格蘭同荷蘭考察，行程本來由十二號到二十一號，了解當地農業、漁業嘅發展，點知由十七號開始就滯留喺倫敦四日，因為機場關閉，佢哋買唔到機票去荷蘭，為咗張機票，日日都去機場撲嚟撲去，最終都係買唔到，卒之前日要買歐洲之星火車飛，兜個圈經比利時再去荷蘭，趕及去阿姆斯特丹考察。

雖然流落異鄉，但佢哋有內地官員同旅行社職員陪同，旅行社幫佢搞掂滯留期間嘅住宿問題。不過肥根都係一肚火，大鬧嗰幾日希思路機場直頭冇人指揮一樣，亂晒大龍，令佢深深體會何謂難民心態。