政情：兩個娜姐見報率勁高

教育學院語言資訊科學研究中心尋日公布香港、北京、上海同台灣二○一○年名人榜，列出四地見報率最高嘅二十五位名人，香港方面有八位政要上榜，其中國家主席胡錦濤排榜末，排名被第十六位嘅「o靚模」周秀娜拋離。

港京滬台四地嘅名人榜排名，可以話係各有特色。北京方面，中共中央政治局九位常委全數上榜，而上海剛好相反，係體育界天下，中央政要全部唔入榜；台北就幾乎清一色係台灣人當道；香港則百花齊放，中外政要同藝人都有，菲律賓旅遊巴血案嘅殺人槍手門多薩亦上榜，排第十七位。

呢個排行榜反映香港過去一年嘅新聞焦點，中央領導人有兩人上榜，國務院總理溫家寶排第八位，低於已故艷星狄娜、電視台高層陳志雲同「阿Sa」蔡卓妍等，而另一位中央領導人胡錦濤則排榜末第二十五位。過去一年，o靚模熱潮席捲全港宅男，鼻祖之一嘅周秀娜靠性感起家，風頭勁過領導人，都咪話唔勁！