政情：任亮憲醜聞政壇救世主

聖誕將至，本應靜英英嘅政壇近排卻先有富貴黨兩大員退黨，後有泛民嘅白鴿黨三十人一齊劈炮，跟住再嚟民協主席廖成利辭職，真係七國咁亂。不過呢啲足以影響黨派形象、撼動選民信心嘅消息，卻畀社民連嘅「維園阿哥」任亮憲捲入嘅強姦指控冚晒，難怪政圈有人一邊八卦維園阿哥嘅情史，一邊推崇佢係政壇救星，一招就幫各黨各派收拾咗殘局，唔信問吓白鴿黨主席鐵頭仁同富貴黨主席劉健儀吖！

白鴿黨富貴黨舒口氣

維園阿哥憑喺「城市論壇」嘅發言得名，亦係近年政圈冒起得最快、最識搶風頭嘅能手之一，點知佢嘅負面新聞一樣震撼性十足，自從被指強姦嘅新聞見報後，佢就變身本地報章、雜誌嘅風頭躉，同政圈小花嘅一腳踏幾船情史，與唔同黨派靚女嘅轇轕不清傳聞，恍如一幕幕政圈新秀戀聞錄，吸引力同娛圈人士有得揮。

政圈新秀你有你講，政壇老手卻難得抖大氣。最執到寶嘅可能係白鴿黨，佢哋今年以嚟一直畀社民連瘋狂狙擊，年中支持政改後，包括多名區議員在內嘅約三十名成員日前一次過宣布退黨，形成白鴿黨近年最大嘅內部動盪，點知事件曝光撞正維園阿哥涉強姦，結果白鴿退黨一族見報率超低，對白鴿黨嘅震撼亦大減，呢一役，真可謂維園阿哥救咗白鴿黨。

富貴黨自田北辰同方國珊退黨後，兩大創黨元老復出收拾殘局，政圈本來大把人等睇熱鬧，結果維園阿哥一出，誰與爭鋒？連民協主席退黨嘅消息都變成政圈花絮。周身蟻嘅維園阿哥雖然被視為政壇救星，但對社民連嚟講，卻無異於黨內災星，新一波分裂同內訌風波唔知幾時先完！