短打長擊：漫畫諮詢不如瞓一覺

財爺鬍鬚曾最愛整色整水，繼玩「留意見唔一定要留鬚」之後，又再玩漫畫諮詢預算案，今年漫畫以《擁抱明日 信有晴天》為題。如果咁樣諮詢就能夠「擁抱明日」，香港就唔會搞到怨氣沖天啦。

鬍鬚曾除了懷念昔日由點心妹推出來的熱辣辣蝦餃，亦愛寄望「明日」，漫畫的主角「日仔」，憑着對未來嘅信心，終於渡過難關。呢個諗法完全係鬍鬚曾一廂情願，明日充滿不確定，而我們的明日，陰晴難定，「信有晴天」分分鐘遇上豪雨變成落湯雞！

人貴自知，鬍鬚曾卻是貴人善忘而不自知，早前統計處數字顯示，今年第二季有多達一萬九千名專上教育程度人士，月入少於三千元，較去年同期急增百分之十三。被鬍鬚曾催谷兩年就大學畢業的日仔，如果信有晴天，不是很傻，便是很天真！

鬍鬚曾，你知唔知道香港已進入「學位溢價」年代？去年的大學畢業生，起薪點可以低至六千元；今年只升至七千元，與同年畢業的中五生相比，只高出一千元。日仔即使大學畢業，肯定買唔到樓，如果有女朋友，肯定唔會嫁畀佢！

日仔想憑信心渡過難關，不如瞓一覺做個夢，說不定見到鬍鬚曾化身唐人傳奇小說《枕中記》嗰位道人呂翁，畀個枕頭佢，瞓上去就可以「榮適如意」。之後日仔不僅娶到一位才貌雙全的老婆，自己也官運亨通，出將入相，榮華富貴。後來子孫滿堂，都做了大官，他自己亦享壽八十多歲。

所以話，漫畫諮詢不如瞓一覺，夢中反而有明天！